Turgama d'evangelion

വിശ്വാസികളേ, കേൾപ്പിൻ

സൗഖ്യവുമുയിരും പകരും മൊഴികൾ മോദാൽ

ദൈവകുമാരൻ നരനായ് നമ്മെ മോചിതരാക്കി.

ഈ മൊഴി നിങ്ങൾക്കേകി

ഭാഗ്യം നിറയും വലിയൊരു നിധിയീ ഭൂവിൽ

ഈ സദ്ഗ്രന്ഥം ജീവൻ നൽകും ഔഷധമല്ലോ.

ജീവൻ നൽകാൻ പോരും

ജീവത്‌വചനം കേൾക്കിലൊളിക്കും സാത്താൻ

ബാധകളേതും ഭീതിയൊടുടനേ ഒഴിവായിടും.

സ്വർഗ്ഗം പൂകാൻ പോരും

വാതിലിതല്ലോ വഴിയുമിതല്ലോ നിത്യം

ഈ വഴി പോയാൽ അപകടമന്യേ രാജ്യം നേടാം.

മൃതരീ ശബ്ദം കേൾക്കിൽ

ജീവൻ നേടും സ്വർഗ്ഗം പൂകും ചേലിൽ

ഇതു നിരസിക്കിൽ ജീവിപ്പവരും മൃതരായ് തീരും.

പ്രഭ വിതറിടും ദീപം

ജീവൻതന്നെ ഈ സദ്‌വചനം പാരിൽ

വിധിയാളനെയീ വചനം സുതരാം വെളിവാക്കുന്നു.

ജനതതിയെല്ലാം ചേലിൽ

രക്ഷിതരായി നാഥൻ വഴിയായ് ഭൂവിൽ

പാപം നിയതം മോചിപ്പവനീ നാഥൻ മാത്രം.

വിത്തു വിതയ്ക്കും നാഥൻ

തിരുവചനത്തിൻ വിത്തു വിതയ്ക്കാൻ വന്നു

വയലിനു പകരം ഹൃദയനിലങ്ങൾ നൽകുക നിങ്ങൾ.

നാഥൻ മൊഴിയും നാദം

ഭാഗ്യവുമുയിരും കരുണയുമുലകിൽ തൂകും

ശരണവുമനിശം കൃപയുമിതേകും മനുജനു മോദാൽ.

ആശ്രയമവനിൽ ചേർക്കും

വിശ്വാസികളോ ഭാഗ്യം നിയതം ചൂടും

അവരൊരുനാളിൽ മൃതരായാലും ജീവൻ നേടും.

ആശ്രിതരെയോ നാഥൻ

കൈവെടിയില്ല കാത്തരുളീടും നിത്യം

പാപാങ്കിതരായ് അവരിലൊരാളും മൃതിയടയില്ല.

ദൈവകുമാരൻ ഭൂവിൽ

മാനവനായി തിരുവവതാരം ചെയ്തു

കന്യകയിൽ നിന്നവനൊരുനാളിൽ ജാതനുമായി.

രോഗം സദയം നീക്കി

മൃതരിൽ ജീവൻ പുനരവനേകി മോദാൽ

തിരുവുത്ഥാനം ചെയ്തൊരു നാഥൻ സ്വർഗ്ഗം പൂകി.

റൂഹായെയാ നാഥൻ

ശിഷ്യർക്കേകി ശിക്ഷണമേകി ചേലിൽ

ശിക്ഷണമേകാൻ സദയമച്ചു ദിശകളിലെല്ലാം.

യോഹന്നാൻ തൻ സാക്ഷ്യം

(സുവിശേഷകനാം മത്തായി / മർക്കോസ് / ലൂക്കാ)

അനുഭവമധുനാ വിവരിക്കുന്നു കേൾക്കാൻ

ചെവിയുള്ളവനോ കേട്ടു ഫലങ്ങൾ നൽകീടട്ടെ.